Íslendingur í höfn þrátt fyrir efnahagsstorm

23.02.2009

Hátíðarstund þegar lyklar að skála voru afhentir í dag

Ferðaþjónustu fyrirtækið Íslendingur ehf., tók í dag við Skála Íslendings úr höndum verktakafyrirtækisins Spangar sem stýrt hefur framkvæmdum við verkið á Fitjum í Reykjanesbæ. Skálinn var teiknaður af Guðmundi Jónssyni arkitekt í Noregi, utan um Íslending, hið víðförula Víkingaskip, og er nú þegar orðinn einn af þekktari kennileitum Reykjanesbæjar. Framkvæmdir hófust vorið 2007 og er þeim nú lokið. Í kjölfarið hefst uppbygging Smithsonian safnsins, Vikings- The North Atlantic Saga, en það mun prýða rýmið í kringum víkingaskipið ásamt því að fylla aðra hæð skálans. Áætlað er að byggingin og safnið verði opið fyrir almenning í maí undir nafninu Víkingaheimar.

Steinþór Jónsson, framkvæmdastjóri Íslendings, sagði það mikinn áfanga að hafa náð að koma Íslendingi í sína heimahöfn áður en efnhagsstormurinn skall á en verkinu var að mestu lokið í haust.
Íslendingur kom til Reykjanesbæjar árið 2002 og hefur mikill kraftur fylgt allri uppbyggingu á Fitjunum. Steinþór bætti við að húsið væri reist nokkurn veginn á upprunulegri kostnaðaráætlun sem er einsdæmi í dag. "Það litla sem fór umfram var vegna breytinga sem við fórum fram á. Ein þeirra breytinga var þegar við ákváðum að sleppa gólfdúk og fengum í staðinn möl úr landnámsfjörunni við Höfn í Hornafirði sem við límdum síðan niður sem steinteppi. Það er varla meira við hæfi í þessu húsi en að ganga á fjöru Ingólfs Arnarsonar. Þetta er samstillt verkefni verktaka og verkkaupa og ég er Spöng afar þakklátur fyrir þetta samstarf" sagði Steinþór.

Árni Sigfússon, bæjarstjóri í Reykjanesbæ, þakkaði Guðmundi Jónssyni arkitekt sérstaklega fyrir að hafa breytt skálanum úr skála í listaverk á teikniborðinu. " Guðmundur er frábær arkitekt og þetta hús er til vitnis um það og mun vera til framtíðar" sagði Árni.

Áætlað er að opna Víkingaheima í maí á þessu ári. Markmiðið er að byggja upp einn af fjölsóttustu ferðamannastaði landsins og skapa þarna fjölda stöðugilda.

Þessa má geta að á sunnudagskvöld er á dagskrá Stöðvar 2 þátturinn Sjálfstætt fólk en viðfangsefni þáttarins er skipstjórinn Gunnar Marel Eggertsson, sigling hans til Ameríku og uppbygging Íslendings á Fitjum. Þá mun þjóðinni gefast tækifæri til að líta inn í Víkingaheima.

Jón Bjarni Jónsson framkvæmdastjóri Spangar, Steinþór Jónsson framkvæmdastjóri Íslendings, Elisabeth Waard frá Smithsonian, Árni Sigfússon bæjarstjóri Rnb, Guðmundur Jónsson arkitekt og lengst til hægri standa Grímur Sæmundsen frá Bláa Lóninu og Ríkharður Ibsen frá Lykil Ráðgjöf

Til baka